top of page
licensed-image.jpeg

Peter F. Drucker

Peter F. Drucker (1909-2005) var frumkvöðull á sviði stjórnunarfræða og hafa verk hans verið nýtt sem kennslurit í háskólum, fyrirtækjum og stofnunum um heim allan. Eftir Drucker liggja samtals 39 bækur og yfir hundrað greinar sem lögðu grunninn að því sem á okkar dögum kallast stjórnunarfræði.

    Um Drucker

    Peter F. Drucker fæddist í Austurríki árið 1909, lærði lögfræði í Þýskalandi og starfaði samhliða námi sem ritstjóri eins stærsta dagblaðs Frankfurt borgar. Árið 1935, þremur árum eftir að hann lauk doktorsprófi í lögfræði flutti hann til Englands eftir að ritgerðir hans voru bannaðar og brenndar af nasistum. Stuttu eftir það flutti hann til Bandaríkjanna þar sem hann starfaði sem fréttaritari fyrir fjölda breskra dagblaða ásamt því að sinna stundakennslu í hagfræði. Eftir að Drucker bauðst ráðgjafaverkefni hjá General Motors, seint á fimmta áratug síðustu aldar, lagði hann grunninn að fyrstu bók sinni, The Concept of the Corporation sem kom út árið 1947. 

     

    Árið 1950 varð hann prófessor í stjórnun við New York háskóla og hóf samhliða því ráðgjafaferil sinn að fullu. Árið 1954 gaf hann út bókina The Practice of Management sem er álitin vera grundvallarrit stjórnunarfræðanna. Árið 1959 var Drucker fyrstur til að kynna til sögunnar hugtakið „þekkingarstarf“ sem átti eftir að verða grunnstoð þess hagkerfis sem við þekkjum í dag. Árið 1966 gaf hann út bókina The Effective Executive eða Árangursríka stjórnandann sem hefur síðan þá verið hans vinsælasta bók. 

     

    Þegar Drucker var spurður eitt sinn á gamals aldri hvaða bók hann væri stoltastur af svaraði hann, „næstu bók!“. Þetta viðhorf speglaðist vel í því hversu afkastamikill hann var en eftir Drucker liggja samtals 39 bækur og yfir hundrað greinar þar sem hann skrifaði aðallega um stjórnun og lagði með þeim grunninn að því sem við þekkjum sem stjórnunarfræði í dag.  Hann lést árið 2005, næstum 96 ára gamall, og hélt áfram að kenna, skrifa og veita fyrirtækjum ráðgjöf langt yfir níræðisaldurinn. 

     

    Þegar hann var spurður að því hvert hans mikilvægasta framlag var yfir starfsævi sína svaraði hann: „Ég áttaði mig snemma á því að stjórnun var orðið grundvallartæki í því samfélagi skipulagsheilda sem við búum við í dag. Ég sá að stjórnun snýst ekki um aðeins um „rekstur“ heldur er stjórnun lykilatriði í öllum skipulagsheildum nútímasamfélags. Ég gerði stjórnunarfræði að fagi út af fyrir sig.“ 

     

    „Það er trú mín á fjölbreytileikann og fjölhyggju og sérstöðu allra einstaklinga sem liggur til grundvallar allra þeirra bóka sem ég hef gefið út,“ sagði Drucker enn fremur þegar hann leit yfir feril sinn. Stjórnun, að mati Drucker, snerist ekki um að skipa öðru fólki fyrir, hún snerist ekki aðeins um að reka fyrirtæki heldur snerist hún um að leiða fólk saman til góðra verka. Árangur stjórnenda var því ekki aðeins markmið fyrir framþróun einstaklinga heldur sá Drucker hann sem hreyfiafl sem væri öllu samfélaginu til góðs. Fyrir Drucker snerist fyrirtækjarekstur ekki um hagnað - tekjur væru einfaldlega mælikvarði á árangur. Fyrir honum snerist rekstur um árangurshæfni skipulagsheilda og áhrif þeirra á samfélagið. Þetta viðhorf hans endurspeglast greinilega í lokaorðum bókarinnar um Árangursríka stjórnandann:

     

    „Árangur stjórnenda getur gert þessu samfélagi kleift að koma saman þessum þörfum: þörfum skipulagsheildar fyrir að ná frá einstaklingnum framlaginu sem hún þarfnast og þörf einstaklingsins fyrir að skipulagsheildin þjóni honum sem tæki til að ná fram eigin afrekum. Við verðum að læra að verða árangursrík.“ 

    Aðrar bækur eftir Peter F. Drucker

    1939: The End of Economic Man 
    1942: The Future of Industrial Man 
    1946: Concept of the Corporation 
    1950: The New Society 
    1954: The Practice of Management 
    1957: America's Next Twenty Years 
    1959: The Landmarks of Tomorrow 
    1964: Managing for Results 
    1967: The Effective Executive 
    1969: The Age of Discontinuity 
    1970: Technology, Management and Society 
    1971: The New Markets and Other Essays 
    1971: Men, Ideas and Politics 
    1971: Drucker on Management
    1973: Management: Tasks, Responsibilities, Practices' 
    1976: The Unseen Revolution: How Pension Fund Socialism Came to America 
    1977: People and Performance: The Best of Peter Drucker on Management 
    1978: Adventures of a Bystander 
    1980: Managing in Turbulent Times 
    1981: Toward the next economics, and other essays 

    1982: The Changing World of Executive 
    1982: The Last of All Possible Worlds 
    1984: The Temptation to Do Good 
    1985: Innovation and Entrepreneurship 
    1986: The Frontiers of Management: Where Tomorrow's Decisions are Being Shaped Today 
    1989: The New Realities: in Government and Politics, in Economics and Business, in Society and World View 
    1990: Managing the Nonprofit Organization: Practices and Principles 
    1992: Managing for the Future 
    1993: The Ecological Vision 
    1993: Post-Capitalist Society 
    1995: Managing in a Time of Great Change 
    1997: Drucker on Asia: A Dialogue between Peter Drucker and Isao Nakauchi 
    1998: Peter Drucker on the Profession of Management 
    1999: Management Challenges for 21st Century 
    1999: Managing Oneself 
    2001: The Essential Drucker 
    2002: Managing in the Next Society 
    2002: A Functioning Society 
    2004: The Daily Drucker 

    bottom of page